RDC–Ouganda: Mtoto wa Museveni atishia kuiunganisha Kisangani kwa Uganda kabla ya mwisho wa 2025
Kauli tata kutoka kwa Jenerali Muhoozi Kainerugaba, Mkuu wa Jeshi la Uganda na mtoto wa Rais Yoweri Museveni, imezua taharuki kubwa katika ukanda wa Afrika ya Kati. Kupitia ujumbe wake wa hivi karibuni, Muhoozi ametangaza hadharani kuwa mji wa Kisangani, ulio mashariki mwa Jamhuri ya Kidemokrasia ya Kongo (RDC), utaunganishwa rasmi na Uganda kabla ya mwaka 2025 kumalizika.
Akizungumza kwa maneno ya kuchokoza, alisema:
“RDC si nchi tena. Ni eneo kubwa lisilo na uongozi. Kila mmoja achukue sehemu yake. Nchi yangu Uganda itachukua Kisangani mwaka huu. RDC haipo tena.”
Muhoozi pia aliikosoa mikutano ya Doha na makubaliano ya Marekani kuhusu mzozo wa mashariki mwa Kongo, akidai kuwa nia ya mazungumzo hayo si amani, bali kugawanya ardhi ya Kongo yenye utajiri mkubwa wa rasilimali.
Kauli hii imekuja wakati ambapo hali ya usalama katika mashariki mwa Kongo inazidi kuwa tete, huku kukiwa na tuhuma kuwa baadhi ya majirani wa Kongo, kama Uganda na Rwanda, wanaunga mkono makundi ya waasi kama M23.
Mpaka sasa, serikali ya Kinshasa haijatoa tamko rasmi, lakini mashirika ya kiraia na viongozi wa kisiasa wameanza kulaani vikali kauli hiyo, wakisema ni tishio kwa uhuru na mamlaka ya taifa.
Wachambuzi wa kisiasa wanaonya kuwa kauli kama hizi zinaweza kusababisha mgogoro wa kidiplomasia kati ya DRC na Uganda, na kuzorotesha juhudi za kupatikana kwa amani ya kudumu katika eneo la Maziwa Makuu.
🔻 Swali kwa raia wa Kongo: Tutakaa kimya hadi lini tukiambiwa nchi yetu haipo?
EXETAT 2025: Rekodi ya Ushiriki na Mageuzi ya Kidijitali
Qatar yatoa ndege ya kifahari kwa Marekani bure, Trump aitarajia kama Air Force One mpya