RDC : Ouganda yafungua mipaka na maeneo yanayodhibitiwa na M23
Serikali ya Uganda imefungua tena mipaka yake na Jamhuri ya Kidemokrasia ya Congo (RDC), hasa katika maeneo ya Kivu Kaskazini yanayodhibitiwa na waasi wa M23. Taarifa hii imethibitishwa na vyanzo vya kikanda vinavyoeleza kuwa shughuli za usafirishaji wa bidhaa na watu zinaanza kurejea taratibu kupitia maeneo hayo, ikiwemo Bunagana na Kitagoma.
Hatua hii ya Uganda imezua hisia mseto miongoni mwa raia na viongozi wa Kongo, kwani maeneo hayo bado hayajakombolewa na jeshi la FARDC, bali yanadhibitiwa na kundi la waasi wa M23 linalotuhumiwa kupokea msaada kutoka Rwanda. Kufunguliwa kwa mpaka kunaweza kutafsiriwa kama uhalalishaji wa udhibiti wa M23 katika maeneo hayo, jambo linalozua maswali kuhusu msimamo wa Uganda katika mgogoro wa mashariki mwa Kongo.
Wachambuzi wa siasa za Maziwa Makuu wanasema hatua hii inaweza kuwa sehemu ya ajenda ya kiuchumi na kijeshi ya Uganda, ikilenga kuimarisha ushawishi wake katika ukanda huo huku ikitafuta kunufaika na rasilimali zilizopo mashariki mwa Kongo. Wengine wanasema inaweza kuwa sehemu ya makubaliano yasiyo rasmi kati ya baadhi ya mataifa jirani na M23.
Wakati huo huo, serikali ya Kinshasa haijatoa tamko rasmi juu ya hatua hiyo, huku raia wengi wa Kongo wakitaka majibu ya haraka kutoka kwa viongozi wao. Mashirika ya kiraia na wanaharakati wa amani wametoa wito kwa jumuiya ya kimataifa kushinikiza kuheshimiwa kwa mipaka ya kitaifa na kutafuta suluhisho la kweli kwa mgogoro wa Kivu Kaskazini.
Mwandishi: MANGWA