Kinshasa, Juni 15, 2025 —
Katika hali ya kisiasa iliyojaa mashaka, Didier Okito Lutundula, mwanasiasa maarufu na kiongozi ndani ya muungano wa Union sacrée, ametangaza hadharani wasiwasi wake juu ya kusitishwa kwa ghafla kwa mkataba kati ya Marekani na Jamhuri ya Kidemokrasia ya Kongo (RDC). Amedai kuwa huu unaweza kuwa mchezo wa kiudanganyifu wa kidiplomasia unaolenga kuwapumbaza Wacongomani.
Akihoji dhamira ya dhati ya Marekani katika mchakato wa ushirikiano na Kongo, Okito amesema wazi kuwa:
“Marekani haitaweka maslahi ya Kongo juu ya yale ya Rwanda kamwe. Tumekuwa tukijifunza kutoka historia na uzoefu wa moja kwa moja.”
Kauli hii inakuja baada ya waziri wa mambo ya nje, Olivier Ndungire, kuchapisha kwenye mitandao ya kijamii kwamba hakutakuwa na mkataba wowote wa pamoja utakaotiwa saini kati ya DRC na Rwanda siku ya Jumapili tarehe 15 Juni.
Didier Okito, ambaye anadai kuwa na uelewa wa undani wa siasa za Rwanda kutokana na makuzi yake, anaamini kwamba marekebisho ya mkataba huo ni hila ya kimataifa na ni lazima Wacongomani wawe makini na si wafuate kila tamko la mataifa makubwa kwa upofu.
“RDC haiwezi tena kuwa na imani ya kipofu kwa Marekani. Hatutaki kuona taifa letu likigeuzwa kuwa kibaraka wa mataifa ya kigeni,” alisema kwa msisitizo.
Katika mapendekezo yake, Okito anatetea suluhisho la ndani, akisisitiza haja ya mkutano wa kitaifa jumuishi ili kukabiliana na changamoto za kiuchumi, kisiasa, na kijamii kwa njia ya kizalendo na yenye mwelekeo wa kujitegemea.
Kauli ya Didier Okito Lutundula inaibua mjadala mkubwa juu ya nafasi ya DRC katika ulingo wa diplomasia ya dunia. Je, DRC inapaswa kuendelea kutegemea usaidizi wa kimataifa, au ni wakati wa kuchukua usukani wa hatima yake kwa mikono yake yenyewe?
✍🏾 Mwandishi: MANGWA