Me Guy Kabombo Amtembelea Marie José Biuma, Shujaa wa Jeshi la Kongo
Katika ishara ya heshima na kutambua mchango wa mashujaa wa taifa, Makamu wa Kwanza wa Waziri wa Ulinzi wa Jamhuri ya Kidemokrasia ya Congo (RDC), Me Guy Kabombo Muadiamvita, amefanya ziara maalum katika mtaa wa Lemba kumtembelea Bi Marie José Biuma, aliyewahi kuwa mwanajeshi wa kikosi cha maparachuti cha Congo na sasa ana umri wa miaka 82.
Bi Biuma, ambaye alikuwa miongoni mwa maparachuti wa mwanzo wa Jeshi la Congo katika miaka ya 1960, anasifiwa kwa ujasiri wake wa kipekee na uwezo wa kuruka kwa urefu wa hadi mita 6000. Leo, akiwa mzee na akihitaji msaada wa kijamii, aliwahi kutoa wito wa msaada kwa serikali ili kuboresha maisha yake na kutambuliwa rasmi kwa mchango wake mkubwa kwa taifa.
Katika mazungumzo yao, Me Guy Kabombo alisifu moyo wa uzalendo na ujasiri wa Bi Biuma, na kuahidi kufikisha ujumbe wake kwa Rais Félix Antoine Tshisekedi Tshilombo, ambaye pia ni Amiri Jeshi Mkuu wa Majeshi ya Congo. Aidha, aliahidi kufuatilia suala hilo kwa karibu kupitia ofisi ya Katibu Mkuu wa Ulinzi na Katibu Mkuu wa Wastaafu wa Jeshi.
Bi Biuma, aliyefarijika sana na ziara hiyo ya heshima, alimbariki Me Guy Kabombo kupitia sala maalum, ishara ya shukrani na baraka kwa viongozi wanaothamini historia ya mashujaa wa taifa.
Ziara hii ni ukumbusho wa thamani ya kuenzi mashujaa wa zamani, hususan wanawake walioshiriki kwa ujasiri katika historia ya kijeshi ya Congo.
Mwandishi: MANGWA
