Waterkloof, Juni 14, 2025 – Kikosi cha kwanza cha wanajeshi wa Jeshi la Ulinzi la Taifa la Afrika Kusini (SANDF) kimetua salama katika kituo cha kijeshi cha Waterkloof, kikitokea Jamhuri ya Kidemokrasia ya Kongo (DRC), baada ya kukamilisha jukumu lao katika operesheni ya kikanda.
Wanajeshi hao waliokuwa sehemu ya ujumbe wa kusaidia juhudi za kurejesha amani na uthabiti mashariki mwa DRC, wamepokelewa kwa heshima kubwa katika uwanja huo wa kijeshi, huku viongozi wa kijeshi wakisifu ujasiri na kujitolea kwao katika mazingira hatarishi ya vita.
Jeshi la Afrika Kusini limethibitisha kuwa ndege iliyowabeba ilitua kwa usalama bila tukio lolote, na operesheni ya kuwarejesha wanajeshi hao itafuatiwa na tathmini ya kina kuhusu mafanikio na changamoto walizokutana nazo wakati wa utekelezaji wa majukumu yao katika ukanda wa Maziwa Makuu.
Kurudi kwa wanajeshi hawa kunaashiria mwanzo wa kupunguzwa kwa uwepo wa kijeshi wa Afrika Kusini katika DRC, baada ya miezi kadhaa ya operesheni chini ya makubaliano ya ushirikiano wa kikanda kwa ajili ya kulinda raia dhidi ya waasi na kuhakikisha ustawi wa kijamii na kiusalama katika eneo hilo.
✍🏾 Mwandishi: MANGWA
#SANDF #AfrikaKusini #DRC #AmaniNaUsalama #MANGWA