Kabare, Jumamosi 14 Juni 2025 – Hali ya usalama imeendelea kuzorota katika eneo la Kabare, mkoani Kivu Kusini, ambapo mapigano makali yameripotiwa katikati ya siku hii ya Jumamosi. Barabara kuu ya Mukongola–Cirunga imefungwa kwa usafiri wote, isipokuwa wanafunzi wachache wa Lycée Canya waliothubutu kukimbia kwa hofu ya kushambuliwa wakiwa darasani.
Kwa mujibu wa ripoti ya saa hii, wanafunzi wa shule ya sekondari Institut Kamole pamoja na watoto wa shule ya msingi École Primaire Kabare Centre wamefungiwa ndani ya madarasa yao kutokana na hali ya taharuki isiyo na kifani.
Taarifa za kiusalama zinaeleza kuwa jengo la Institut Kamole limepata nyufa kubwa, hali inayozua wasiwasi kuhusu usalama wa wanafunzi walioko ndani. Walimu na raia walio karibu na shule hizo wamekuwa wakijaribu kutuliza hali huku wakisubiri msaada wa dharura kutoka kwa mamlaka.
Mashuhuda wa eneo hilo wanatoa wito kwa jamii ya Kabare kuwa macho na kuchukua tahadhari kubwa, huku taharuki ikiendelea kutanda kuhusu uwezekano wa mashambulizi zaidi.
“Tunaomba mamlaka za usalama na misaada ya kibinadamu kuingilia kati haraka. Watoto wetu wako hatarini,” alisema mzazi mmoja kwa njia ya simu.
✍🏾 Mwandishi: MANGWA