Ituri: Jeshi la Congo Laonya Wananchi Wajitenge na Tomas Lubanga — “Jamii Haitakuwa Kamwe Pamoja na Waharibifu wa Amani”
Ituri, Jamhuri ya Kidemokrasia ya Congo – Katika hali ya wasiwasi inayoendelea kuikumba mkoa wa Ituri, jeshi la FARDC limejitokeza kwa sauti ya onyo kali dhidi ya wale wanaoshirikiana na makundi ya waasi, likimtaja moja kwa moja kamanda wa zamani wa waasi, Thomas Lubanga, na kundi lake la CRP (Convention pour la Résistance Populaire).
Katika tamko rasmi lililotolewa Ijumaa, tarehe 25 Julai 2025, msemaji wa operesheni za kijeshi katika Ituri, Luteni Jules Ngongo Chukudi, alitoa ujumbe wa wazi na usiotetereka kwa vijana na raia wa mkoa huo: “Jamii siyo pamoja na waharibifu wa Ituri.”
Akiwa mbele ya waandishi wa habari na maafisa wa kijeshi mjini Bunia, Ngongo alisisitiza kuwa vijana wa Ituri wameanza kulalamikia hadharani uwepo wa silaha na risasi zinazolenga kuchochea vurugu katika eneo hilo. Kulingana naye, kuna taarifa za kuaminika zinazothibitisha kuwa baadhi ya silaha hizo zinahusiana moja kwa moja na kundi la CRP linaloongozwa na Thomas Lubanga, aliyewahi kutiwa hatiani na Mahakama ya Kimataifa ya Uhalifu (ICC) kwa kuwahusisha watoto katika vita.
“Waambieni Tomas Lubanga: jamii siyo pamoja naye. Jamii haitakubali kamwe kurudi kwenye enzi za damu, uchomaji wa vijiji, na uharibifu wa maendeleo. Ituri inataka amani,” alisema Luteni Ngongo kwa msisitizo mkubwa.
Kwa niaba ya gavana wa kijeshi wa mkoa wa Ituri chini ya hali ya “état de siège”, Luteni Jenerali Johnny Luboya N’kashama, msemaji huyo alitoa mwito kwa wananchi wote kuwa macho na kuchukua hatua za dhati kulinda utulivu. Alisisitiza kuwa kila mmoja anao wajibu wa kutangaza, kuonya, na kutoa taarifa kuhusu maeneo yanayotumiwa kama maficho ya waasi au vituo vya silaha.
Mapambano Dhidi ya Uharibifu wa Ndani
Kwa miezi kadhaa sasa, Ituri imekuwa kitovu cha vurugu zinazosababishwa na makundi yenye silaha, wakiwemo waasi wa CODECO na CRP. Hali hii imesababisha maelfu ya watu kukimbia makazi yao, shule kufungwa, na shughuli za uchumi kusimama.
Tamko hili kutoka kwa FARDC linakuja katika wakati ambapo baadhi ya watu waliokuwa wametangaza kurejea kwenye maisha ya kawaida wameanza kutuhumiwa kushirikiana kwa siri na wanamgambo wanaojipanga upya mashambani.
Ngongo amesisitiza kuwa serikali ya DRC haitasita kuchukua hatua kali za kijeshi kwa mtu yeyote au kikundi chochote kitakachojaribu kuendeleza ghasia. Ametoa wito kwa viongozi wa kijamii na wa dini kushirikiana na vyombo vya usalama katika kulinda amani.
“Tunaomba jamii, wazee wa kimila, makanisa, na mashirika ya kiraia kusimama kidete. Tusikubali Thomas Lubanga na kundi lake CRP kuvuruga mwelekeo wa maendeleo tulioanza kuujenga,” alisema Ngongo.
Mwito wa Ukombozi wa Kiakili
Kwa kumalizia, Ngongo alisema kuwa Ituri haitakombolewa tu kwa bunduki, bali kwa mabadiliko ya fikra: “Ukombozi wa kweli ni ule unaotoka ndani ya akili za vijana. Lazima wajue kwamba mustakabali wao hauko vitani, bali katika elimu, kazi, na mshikamano wa kitaifa.”
Kwa sasa, jeshi la FARDC linaendelea kuimarisha doria na ulinzi wa maeneo nyeti, huku serikali ya kijeshi ya Ituri ikitayarisha mikakati mipya ya kuhakikisha kuwa Bunia na maeneo ya jirani hayageuki tena kuwa ngome za waasi wa CRP au wapinzani wengine wa amani.
“Tutapigana hadi tone la mwisho kulinda raia wetu dhidi ya uharibifu wa kijeshi wa kihalifu,” alisema kwa ukali Luteni Ngongo.
Lubero Yatikiswa: Mapigano ya Wazalendo na ADF Yaua 10, Wakiwemo Raia
FARDC Yapiga Marufuku Safari za Nje kwa Maofisa