Katibu Mkuu wa Umoja wa Mataifa, António Guterres, ametoa pongezi rasmi kwa hatua muhimu ya kusainiwa kwa tamko la kanuni za msingi kati ya serikali ya Jamhuri ya Kidemokrasia ya Kongo (DRC) na kundi la waasi la AFC/M23, lililotekelezwa tarehe 19 Julai 2025 jijini Doha, Qatar.
Kupitia msemaji wake Stéphane Dujarric, Guterres amelitaja tamko hilo kuwa ni “hatua kubwa kuelekea amani ya kudumu, usalama na kurejea kwa wakimbizi na watu waliokimbia makazi yao,” akisisitiza kuwa ukanda wa mashariki mwa DRC umekuwa ukitaabika kwa miaka mingi kutokana na mizozo ya kivita.
Makubaliano haya yamepokelewa kwa matarajio makubwa na wananchi wa Kongo, wakiyaona kama nafasi mpya ya kurejesha utulivu na mshikamano. Guterres amezitaka pande zote kutekeleza kwa dhati na haraka ahadi walizoweka, akieleza kuwa mafanikio ya mchakato huu yanategemea zaidi utayari wa wahusika kuweka vitendo kwenye maneno yao.
Aidha, Guterres ameeleza shukrani za dhati kwa serikali ya Qatar kwa kuratibu na kuwezesha mazungumzo hayo nyeti yaliyowaleta pamoja wahusika wa mzozo kwa mara ya kwanza katika mazingira ya maelewano.
Umoja wa Mataifa umetangaza kuwa utaendelea kuunga mkono jitihada zote za kufanikisha amani, kulinda raia, na kuimarisha utawala bora nchini DRC kwa kushirikiana na serikali ya Kongo, nchi jirani na washirika wa kimataifa.
Kwa mamilioni ya Wakongo waliokuwa wamekata tamaa, tamko hili la Doha linaibua matumaini mapya ya usalama, heshima, na mustakabali bora, baada ya miongo kadhaa ya vita visivyokwisha.
DRC na M23 Wafikia Makubaliano ya Amani Doha
AFC/M23 Yakanusha Kuwaza Kuondoka Nchini: “Sio Mazungumzo ya Kujisalimisha”